Nakab-ot sa usa ka sikat nga dancer sa Nigeria ang iyang target nga pagsayaw og pito ka adlaw nga walay hunong sa Freedom Park sa Lagos, Nigeria.
Si Benjamin Daniel Gabriel, o mas nailhan sa ngalang “Ben Dancer”, opisyal nga mitapos sa iyang marathon dance human sa 176 ka oras, 52 ka minuto, ug 59 ka segundo nga sige og sayaw.
Nagsugod ang iyang dako nga pagsulay niadtong Septyembre 22 ug gani bisan pa man nga naabot na niya ang iyang orihinal nga target nga 168 ka oras o pito ka adlaw pag-abot sa alas-3 sa kaadlawon, gipili pa gihapon ni Daniel nga palawigon ug dugangan og siyam ka oras ang iyang pagsayaw hangtod nga miabot kini sa udto aron masiguro ang iyang kadaugan.
Tumong ni Daniel, kinsa usa usab ka propesyonal nga dancer uban sa musikero nga si Made Kuti nga mabungkag ang kasamtangang Guinness World Record alang sa Longest Dance Marathon by an Individual.
Ang kasamtangang record gihuptan pa ni Srushti Sudhir Jagtap gikan sa India, kinsa misayaw og 127 ka oras niadtong tuig 2023 apan nalabwan kini ni Daniel og kapin sa 41 ka oras.
Photo courtesy: The Guardian Nigeria
