Naay pressure ug nagkasagol nga emosyon ang mga miyembro sa Viva Hot Babes sa ilang pagpangandam alang sa gipaabot nga reunion concert, sumala sa ilang mga gipadayag sa mga interbyu sa telebisyon.
Ang grupo misikat sa early 2000 pinaagi sa mga kantang “Bulaklak” ug “Kikay,” nangandam alang sa “BULAKLAK: Viva Hot Babes Reunion Concert” sa Oktubre 23, 2026, sa New Frontier Theater sa Quezon City.
Giangkon sa mga miyembro nga dako ang ilang pressure ug nagkasagol ang ilang emosyon human sa 23 ka tuig. Matod nila, grabeng pagpangandam ang ilang gihimo, ilabina sa mga ensayo ug bag-ong pasundayag nga ilang ipakita sa mga fans.
Gipadayag usab ni Katya Santos sa miaging media conference nga paspas ang pag-andam sa proyekto, hinungdan nga nakasinati sila og pressure. Si Andrea del Rosario, sa laing bahin, miingon nga gusto nilang mahimong selebrasyon ang reunion sa ilang panaghigalaay ug sa ilang panaw isip mga babaye ug inahan.
Kauban sa reunion concert ang mga miyembrong sila Maui Taylor, Katya Santos, Andrea del Rosario, Gwen Garci, Sheree, Jaycee Parker, Ella V. ug Jennifer Lee.
Bisan pa sa pressure, gilauman sa grupo nga mahimong malampuson ang ilang pagbalik sa entablado ug mahatagan og bag-ong kasinatian ang ilang dugay nang mga fans.
Photo courtesy: pep.ph
