Gipalig-on sa Philippine National Police (PNP) ang intelligence monitoring ug koordinasyon sa mga langyawng awtoridad aron mapugngan ang bag-ong pamaagi sa mga sindikato sa pagpalusot og ilegal nga droga sa Pilipinas.
Kini nga lakang gihimo human nasakmit sa mga awtoridad sa Laos ang 521 ka kilo sa gituohang shabu gikan sa usa ka pribadong eroplano. Sumala kang PNP Chief Police General Jose Melencio Nartatez Jr., gisusi na sa kapulisan ang pagpanag-iya sa maong eroplano, ang mga detalye sa paglupad niini, ug ang posibleng destinasyon sa kargamento. Gitan-aw usab sa mga imbestigador ang laing taho bahin sa kapin usa ka toneladang gituohang shabu nga nasakmit sa Thailand nga gikataho usab nga padulong unta sa nasod.
Gipasabot ni Nartatez nga importante ang pagpaambit sa impormasyon ug koordinasyon sa mga kapolisan sa ubang nasod aron mapugngan ang paggamit sa Pilipinas isip destinasyon o transit point sa ilegal nga droga. Giawhag usab niya ang publiko nga mohatag og kasaligan nga impormasyon ngadto sa mga awtoridad aron matabangan ang pagdakop sa mga responsable samtang nagpadayon pa ang imbestigasyon sa maong kargamento.
Photo courtesy:Royal Malaysia Police / Bernama
