Mokabat sa ₱841,160 nga kantidad sa gituohang shabu ang nasakmit sa kapulisan samtang lima ka indibidwal ang nadakpan sa upat ka managlahing buy-bust operations nga gipahigayon sa Valencia City sugod Oktubre 10 hangtod sa kaadlawon sa Oktubre 11, 2026.
Unang nadakpan sa Purok 2B, Barangay Colonia si alyas “Dodong,” 26 anyos ug residente sa Dangcagan, kon diin nasakmit ang gibanabanang ₱714,000 nga kantidad sa shabu, samtang nadakpan usab sa Purok 18, Barangay Poblacion si alyas “Jojo,” 26 anyos nga taga-Old Kibawe nga nakuhaan og ₱42,160 nga shabu. Laing duha ka suspek nga sila alyas “Warren,” 30 anyos, ug “Dagul,” 25 anyos, ang nadakpan sa Barangay Bagontaas diin nakuha ang ₱62,560 nga illegal nga droga, ug katapusang nadakpan sa Purok 6, Barangay Colonia si alyas “Justin,” 23 anyos, nga nakuhaan usab og ₱22,440 nga shabu.
Gipahigayon ang maong mga operasyon sa pakigtambayayong sa Bukidnon Provincial Drug Enforcement Unit, Valencia City Police Station, Bukidnon Provincial Intelligence Unit, ug City Anti-Drugs Special Unit Team (CADSUT). Pagpakita usab kini sa padayong suporta sa Lokal nga Panggamhanan sa Valencia sa pagpanguna ni Mayor Amie Galario ug Vice Mayor Greizl Galario-Fernandez aron mapanalipdan ang kalinaw ug seguridad sa dakbayan.
Photo courtesy: Valencia City Police Station /LGU
