Gilauman nga molapas sa P21 trilyon ang outstanding debt sa gobyerno sa Pilipinas sa 2027, tungod sa depreciation sa peso ug pagtaas sa panginahanglan sa pagpangutang.
Base sa datos sa Department of Budget and Management, mokabat sa P21.48 trilyon ang utang sa nasod sa katapusan sa 2027, o 8.7 porsyentong mas taas kumpara sa girebisang P19.77 trilyon karong 2026.
Gipataas usab sa administrasyong Marcos ang borrowing plan ngadto sa P3.3 trilyon gikan sa P2.73 trilyon karong tuiga. Matud sa DBM, P2.39 trilyon niini ang gikan sa domestic sources samtang P915 bilyon ang gikan sa foreign creditors.
Sumala ni Budget Assistant Secretary Romeo Matthew Balanquit, nakaapekto sa utang ang pagkahuyang sa peso ug mas taas nga interest rates sa pag-refinance sa mga daang utang. Samtang, gilauman nga mosaka ngadto sa P2.7 trilyon ang debt servicing sa 2027, diin P1.6 trilyon ang alang sa principal amortization ug P1.11 trilyon alang sa interest payments.
Bisan pa niini, giingon sa DBM nga nagpabilin ubos sa 70 porsyentong benchmark ang debt-to-GDP ratio sa nasod.
Photo Courtesy: Philippine News Agency
