Gipahigayon sa Provincial Detention and Rehabilitation Center (PDRC) ang duha ka adlaw nga libreng chest X-ray ug physical health screening alang sa mga Persons Deprived of Liberty (PDLs) subay sa tinuig nga pagsaulog sa Lung Month karong Agosto 2026.
Sa usa ka eksklusibong pakighinabi sa Juander Radyo Malaybalay kang PDRC Jail Warden Nelson Balaba, gibutyag niini nga ang inisyatiba gipatuman inabagan sa City Health Office, Provincial Health Office, ug Department of Health (DOH) aron masuta ang kahimtang sa panglawas sa mga binilanggo ug matino kon aduna bay nataptan sa Tuberculosis (TB).
Target sa maong kalihokan nga maserbisyohan ang 500 ka mga PDL gikan sa kinatibuk-ang populasyon sa pasilidad nga mikabat sa 1,122 ka lalaki ug 67 ka babaye.
Gipasalig sa pamunuan sa PDRC nga kon ugaling adunay magpositibo sa maong sakit, dali kining ibulag o ipaubos sa isolation aron mapugngan ang pagpanakod sulod sa prisohan.
Diretso usab silang ipaubos sa libreng pagpatambal pinaagi sa TB-DOTS program sa kagamhanan aron mahatagan og saktong medikasyon hangtod sa ilang hingpit nga pagkaayo, diin gipasabot ni Warden Balaba nga kini regular nga gihimo matag tuig aron mapanalipdan ang panglawas sa tanang piniriso.
Photo Courtesy: PDRC – BUKIDNON
