Nakabsan sa kinabuhi ang duha ka babaye samtang 14 ang nangaangol human maaksidente ug mibalitok ang usa ka Isuzu Dropside Truck sa may Plantation Road, Purok 4, Mabao Area, Barangay Lurugan, Valencia City, Bukidnon, bandang alas 5:30 sa buntag kagahapon Agosto 12, 2026.
Base sa imbestigasyon sa Valencia City Police Station, nagsubay sa maong dalan ang truck nga kargado og 16 ka pasahero nga mga trabahante sa pinyahan ug gimaneho sa usa ka 58-anyos nga driver sa dihang napawong ang makina niini samtang nagtungas, hinungdan nga miatras ug nawad-an sa kontrol hangtod nga hingpit kining nayabo.
Tungod sa kakusog sa impact, nakaangkon og grabeng samad sa kalawasan ang duha ka biktima nga nag-edad og 44 ug 47 anyos nga pulos gideklarang dead on arrival sa mga doktor sa Adventist Medical Center.
Samtang ang laing 14 ka pasahero nga nangaangol daling gidala sa lain-laing tambalanan sa dakbayan sama sa Valencia Polymedic Medical Hospital, Adventist Medical Center, Valencia Medical Hospital, ug Laviña General Hospital alang sa dinalian nga pagtambal.
Sa kasamtangan, gikustodiya na sa Valencia CPS ang driver alang sa tukmang disposisyon ug pagpasaka og kaso.
Photo Courtesy:Valencia City Police Station
