Gibanabanang moabot sa 8,000 ka mga eskwelahan ug 6 ka milyong mga estudyante sa tibuok nasod ang naapektuhan sa mga pagbaha ug pagdahili sa yuta tungod sa sunod-sunod nga mga Bagyong Luis ug Maymay inabagan sa gipakusog nga Habagat.
Sumala ni Education Secretary Sonny Angara, mokabat kini sa ika-limang bahin (1/5) sa kinatibuk-ang gidaghanon sa mga eskuylahan sa Pilipinas ug posibleng mosaka pa samtang gikompleto ang mga taho gikan sa nagkadaiyang rehiyon, diin ang Ilocos Region, Central Luzon, ug Cordillera Administrative Region (CAR) maoy labing naigo. Bisan pa man sa mga nasinating kanselasyon sa klase, gipasalig sa kalihim nga adunay igong panahon ang mga estudyante nga makabawi sa ilang mga leksyon pinaagi sa bag-ong three-term academic calendar.
Sa labing ulahing taho sa DepEd, anaa pa sa 217 ka mga eskuylahan ang kasamtangang gigamit isip evacuation centers alang sa kapin 6,400 ka mga pamilyang namakwit.
Dugang pa niini, nagkinahanglan ang ahensya og gibanabanang P32.69 milyon alang sa clearing ug pagpanglimpyo sa 1,157 ka mga tulonghaan, samtang mikabat usab sa P192.86 milyon ang gikinahanglang pundo alang sa pag-ayo sa 3,936 ka mga lawak-saringan ug pasilidad nga nanga-guba tungod sa maong kalamidad
Photo Courtesy:File Photos/NDRRMC
