Mitala na sa labing menos 44 ka mga indibidwal ang nakabsan sa kinabuhi human malunod ang usa ka oveloaded nga pampasaheroang ferry sa Lake Kariba, ang kinadak-ang artipisyal nga lanaw sa kalibotan nga nahimutang sa utlanan sa Zimbabwe ug Zambia.
Sumala sa taho sa Civil Protection Unit, kargado ang maong sakayan og 114 ka pasahero, lima ka tripulante, ug wala pa matinong gidaghanon sa mga bata bisan pa man og 90 lamang ang gitugot nga kapasidad niini sa dihang nahitabo ang trahedya taliwala sa dili maayong panahon ug kusog nga mga balod.
Sa inisyal nga operasyon, 77 ka mga pasahero ang naluwas ug 15 ka patayng lawas ang unang narekober, apan gipahibalo sa Zimbabwe Republic Police nga misaka na sa 44 ang kumpirmadong patay samtang nagpadayon ang pagpangita sa uban pang missing.
Nagtinabangay gilayon ang mga residente ug nagkadaiyang ahensya sa gilunsad nga search and rescue operations, inabagan sa mga lokal nga mananagat, mga diver, dagkong barko, pwersa sa militar, ug usa ka helikopter gikan sa nasudnong parke. Padayon pa gihapon ang hugot nga pagpangita sa mga posibleng missing nga biktima samtang gipalawman pa ang imbestigasyon sa maong makalilisang nga panghitabo.
Photo Courtesy:Instagram
