Nagpadayon ang rescue operation sa western Colombia human mokabat sa 241 ang namatay sa kusog nga 7.4 magnitude nga linog. Kapin 1,670 ka tawo ang nasamdan, samtang daghang pamilya ang napugos sa pagpuyo sa mga parke tungod sa pagkaguba sa ilang mga balay ug kahadlok sa aftershocks.
Gigamit sa mga rescuers ang cranes, sniffer dogs ug heavy equipment sa pagpangita sa mga tawo nga posibleng natanggong ilalom sa rubble. Mitabang usab ang mga volunteers sa mano-manong pagtangtang sa mga tipak sa building.
Sa usa ka rescue site, nakit-an ug naluwas ang usa ka lalaki ug usa ka bata human madungog ang whistle gikan sa ilalom sa naguba nga epidisyo. Naapektuhan usab ang mga ospital. Sa Cali, napugos ang usa ka ospital nga ibalhin ang mga pasyente ngadto sa parking area human madaot ug mahugno ang pipila ka bahin sa building.
Gideklarar sa gobyerno ang state of emergency ug gisaad ang ayuda sa mga naapektuhan. Naghatag usab ang Estados Unidos og 15.5 milyon ka dolyar nga emergency aid.
Nagpadayon ang pagpangita sa mga rescuers sa mga posibleng survivors samtang nag-uyog gihapon ang mga lugar tungod sa aftershocks.
Photo Courtesy: CNBC
