Misuporta ang Department of Agriculture o DA sa unang modernong enoki mushroom facility sa Pilipinas nga nahimutang sa Silang, Cavite. Kabahin kini sa polisiya sa DA nga mapulihan ang imported nga produkto pinaagi sa pagpalig-on sa lokal nga produksyon.
Matod sa DA, kapin 6,000 metric tons nga enoki mushrooms ang gi-import sa Pilipinas matag tuig, busa dako ang potensyal sa lokal nga industriya ug umaabot nga export sa Singapore ug Middle East.
Gibanabana nga 50 ka trabaho ang makamugna sa pasilidad, lakip ang dugang panginabuhian alang sa mga mag-uuma nga nagsuplay og agricultural biomass ug ubang hilaw nga materyales.
Gigamit usab niini ang corn cobs ug rice hulls nga mokabat sa lima ka tonelada matag semana isip substrate sa pagpatubo sa mushrooms.
Tungod sa lokal nga produksyon, miubos ang presyo sa enoki mushroom ngadto sa ₱29.75 kada retail pack, gikan sa kanhing presyo nga mokabat sa ₱80 kada 200 gramos.
Samtang, gipadayon usab sa DA ug University of the Philippines Los Baños ang panukiduki sa ube aron mapalambo ang lokal nga produksyon ug mapalapad ang export opportunities sa nasud.
Photo Courtesy: Instagram
