Misaad si Lt. Gen. Donald Gumiran nga himoong mas lig-on, mas may kapasidad ug future-ready force ang Philippine Army atol sa iyang pormal nga pag-angkon sa mando niadtong Martes. Mipuli si Gumiran kang kanhi Army chief Lt. Gen. Antonio Nafarrete, nga napromote isip full general human siya mahimong Armed Forces of the Philippines chief of staff niadtong Hulyo 21.
Si Gumiran miyembro sa Philippine Military Academy Class of 1992 ug kanhi nang nangulo sa Western Mindanao Command, gawas sa ubang importanteng posisyon sa militar. Sa iyang assumption speech sa Army headquarters sa Fort Bonifacio, Taguig City, gipadayag ni Gumiran ang iyang tumong nga mapalig-on ang organisasyon pinaagi sa iyang gitawag nga S.T.R.O.N.G. Framework.
Nagpasabot kini sa Stewardship, Transformation, Readiness, Organizational Development, Nation-Building, ug God-fearing nga serbisyo. Lakip sa iyang prayoridad ang padayon nga modernization sa personnel, capabilities, doktrina ug mga sistema sa Army, ingon man ang pagpalig-on sa kahandam sa tropa sa nagkalain-laing operasyon.
Gipasalig usab ni Gumiran ang pagpalig-on sa mga institusyon, pagpalambo sa mga lider, pagmintinar sa professionalism ug pagtabang sa peace, security ug development sa nasud.
Photo Courtesy: Kalinaw News
