Planong ipatuman sa Department of Agriculture (DA) ang dugang nga taripa sa pipila ka imported meat products aron mapanalipdan ang lokal nga industriya sa agrikultura ug mga domestic producers.
Pinaagi sa Department Order No. 24, gihangyo sa DA ang Bureau of Customs (BOC), pinaagi sa Department of Finance, nga ipatuman ang volume-based safeguard (SSG) duties sa mga agricultural products nga milapas sa gitakdang import volume thresholds.
Lakip sa mga produktong sakop sa maong safeguard measure ang presko o chilled nga boneless beef, chicken curry nga anaa sa airtight containers, ingon man mga produkto sa baboy sama sa ham ug cuts, meat offal, dugo sa baboy ug luncheon meat.
Matod sa DA, nakabantay ang Trade Remedies Office nga ang aktuwal nga import volume sa pipila ka agricultural products milapas sa gitakdang trigger levels. Tumong sa SSG duties nga mapugngan ang posibleng kadaot sa lokal nga industriya tungod sa sobra nga pagdagsa sa imported products.
Ang BOC maoy responsable sa pagkalkula ug pagpatuman sa katugbang nga SSG duty subay sa balaod. Ang maong safeguard duties magpabiling epektibo hangtod sa kataposan sa tuig sa ilang pagpatuman, gawas kung kini sayo nga pakunhuran o tapuson subay sa mga regulasyon.
Photo courtesy: Global Times
