Nakakuha og ikatulong pwesto ang University of the East o UE Red Warriors human gipaluhod ang University of the Visayas Green Lancers, 98-75 sa Cebu City Sports Institute. Nag-una sa UE si Christopher Lagat nga nakapuntos og 24, samtang mitampo og 14 puntos si JM Edoukou. Midugang usab sila John Xyrus Gemao ug Johndrew Jimenez og 11 ug 10 puntos.
Tungod sa maong kadaugan, nakakuha ang UE og P50,000 nga consolation prize ug mitapos sa unom ka adlaw nga tournament nga adunay 3-2 nga rekord.
Napakyas ang UE sa pag-abot sa championship round human tabla sila sa University of Cebu sa 2-2 nga rekord. Nakakuha sa ikaduhang championship berth ang UC pinaagi sa winner-over-the-other rule human gipalagpt ang UE, 89-85, sa eliminations.
Sa pikas bahin, nag-una sa UV si Kent Ivo Salarda nga adunay 22 puntos ug unom ka rebounds, apan napakyas ang Green Lancers sa pagpugong sa kadaugan sa UE.
Photo courtesy: University lifestyle.co
