Dako og tabang alang sa Cabanglasan Municipal Police Station ang ₱100,000 nga reward money nga gitanyag sa pamilya sa 82-anyos nga biktima nga si Mr. Leon Bangot alang sa bisan kinsa nga makahatag og impormasyon nga motultol sa pagdakop sa suspek sa pagpatay niadtong Hulyo 21, 2026.
Sa eksklusibong pakighinabi sa Juander Radyo Malaybalay, gipadayag ni PCPT Linomer L. Caseres, hepe sa Cabanglasan MPS, nga ang maong reward system magsilbing dugang motibasyon sa mga saksi aron motaho ug makatabang sa pagpadali sa pagsulbad sa kaso.
Hisayrang unang gipahibalo sa pamilya ni Bangot sa nakalabay nga semana pinaagi sa ilang opisyal nga Facebook page ang maong reward isip paningkamot nga makakuha og dugang ebidensya sa imbestigasyon. Kahinumdoman nga napalgan na lamang sa mga kabanay nga dugta na ug adunay mga samad dinunggaban ang biktima sulod sa iyang kaugalingong panimalay.
Sa kasamtangan, padayon ang aktibong imbestigasyon sa PNP diin gilantaw ang nagkalain-laing anggulo sama sa panaglalis sa yuta ug personal nga kasuko isip posibleng motibo sa krimen. Samtang nanawagan usab si Caceres sa mga residente sa Cabanglasan ug sa tibuok Bukidnon nga adunay nahibal-an nga makig-alayon sa ilang buhatan, uban ang paghatag og garantiya nga panalipdan ug itago ang pagkatawo sa bisan kinsang impormante alang sa ilang kaluwasan.
Photo Courtesy: Cabanglasan MPS
