Nagpabilin nga lig-on ang presyo ug abunda ang supply sa mga batakang panginahanglan ug importanteng komodidad (BNPCs) sa tibuok lalawigan sa Bukidnon niadtong bulan sa Hulyo 2026, sumala sa gipagawas nga opisyal nga taho sa Department of Trade and Industry (DTI) Bukidnon Provincial Office.
Pinasikad sa price monitoring sa DTI sa 161 ka mga produkto, miabot sa 101 ka item (62.7%) ang nagpabilin sa ilang daang presyo, samtang 35 ka item (21.8%) ang nakatala og pag-ubos ug 25 ra ka item (15.5%) ang misaka sa price list. Gitino sa ahensya nga ang maong ginagmay nga paglihok sa presyo sa pipila ka komodidad tungod sa normal nga dagan sa merkado, pag-adjust sa presyo gikan sa mga tiggama (manufacturers), ug gasto sa transportasyon ug pag-apud-apod sa mga palaliton.
Taliwala niini, nagpadala gihapon ang ahensya og Letters of Inquiry (LOIs) ngadto sa 14 ka pamatigayon human nasakpan ang ilang paglapas ug pagpasaka sa presyo gawas sa gitakda nga Suggested Retail Price (SRP).
Sa pagkakaron, gipaubos na sa makuting beripikasyon ug ebalwasyon ang 14 ka establisiyemento aron masuta ang ilang tulubagon ug angay nga silot subay sa mga balaod sa patigayon.
Photo Courtesy:DTI – Bukidnon
