Gipahibalo sa Department of Public Works and Highways o DPWH Region 10 nga hapit na masugdan ang rehabilitasyon sa CDO-Puerto Flyover nga dugay nang gireklamo tungod sa nagkaguba ug nangalukot nga aspalto nga naghatag og peligro sa mga motorista nga moagi sa dalan.
Matud ni DPWH-10 OIC Regional Public Affairs and Information Office Chief Jaymaica P. Maraguinot, aduna nay Notice to Proceed nga gi-isyu ngadto sa contractor alang sa retrofitting ug asphalt overlay sa flyover. Apan, temporaryong gipahunong ang pagsugod sa proyekto aron malikayan ang dakong kalangan sa mga motorista ug mga biyahero nga naggikan sa nagkalain-laing bahin sa Mindanao.
Dugang pa niya, gipaningkamotan sa DPWH nga masugdan ang mga trabaho sa hustong panahon ug paagi aron masiguro ang kaluwasan sa mga naggamit sa dalan samtang ginapaayo ang pasilidad.
Ang CDO-Puerto Flyover usa sa mga importante nga agianan sa syudad ug dugay nang gisang-at sa publiko ang reklamo tungod sa kondisyon sa aspalto nga mahimong hinungdan sa disgrasya ilabina sa mga nagmotor.
Photo courtesy: Roads and Traffic Administration
