Padayong ginatun-an sa mga komitiba sa Cagayan de Oro City Council ang gisugyot nga ordinansa nga magregulate sa pagbaligya og contact sement kon mas naila sa brand name nga Rugby ug uban pang volatile substances ngadto sa mga minor de edad.
Sa Joint Committee Meeting nga gilangkuban sa Committee on Public Order and Safety, Liga ng mga Barangay, ug sa Committee on Trade and Commerce daghang mga sugyot ang ilahang nahipos gikan sa mga resource person sa nagkadaiyang buhantan, sama sa City Health Office, CSWD, City Legal Office, PNP ug uban pa.
Gipanghingusgan nga maregulate ang pagbaligya og mga volatile substance ngadto sa mga kabataan aron nga malikayan nga ilaha kini magamit sa dautan labi pa nga gipunting ni Dr. Jan Sherwin Samong, City Health Officer nga dakong kadaut sa panglawas ang pagsinghot og rugby, solvent ug uban pang substance.
Gilapag sab ang concern kung asa, mga hamtong mismo ang mupalit og volatile substance dayon ibaligya ngadto sa mga minor de edad nga nadiskubrehan sab sa mga kapulisan.
Lakip sab sa mahinungdanong mga sugyot ang istriktong pagpatuman sa pagbutang og mga logbook sa mga tindahan nga nagabaligya sa nahisgutang substance, pagbutang sa ngalan, paghimo og parent consent sa mga ginikanan nga igo lang suguon ang ilang mga anak ug pagpresenta og valid IDs.
Isip nangulo sa nahisgutang joint committee meeting, gipaniguro ni Konsehal Roger Abaday nga natigom ang tanang sugyot aron nga malakip sa ginaplastar nga ordinansa.
Photo courtesy: Wikipedia
