Nakarekord ang Pilipinas sa pinakataas nga ani sa palay sa ikaduhang kwarter sulod sa halos 40 ka tuig human makaabot sa 4.63 milyones ka metriko tonelada ang produksyon gikan Abril hangtod Hunyo 2026, sumala sa Philippine Statistics Authority (PSA).
Misaka kini og 5.7 porsyento kumpara sa samang panahon sa miaging tuig ug mao na ang labing taas nga ani sa ikaduhang kwarter sukad pa niadtong 1987.
Matod ni Department of Agriculture Secretary Francisco Tiu Laurel Jr., dako ang natabang sa mga programa sa gobyerno aron mapadayon ang igo nga suplay sa bugas ug mapalambo ang kita sa mga mag-uuma.
Bisan pa sa maayong ani, giandam na sa DA ang mga lakang batok sa gilaumang kusog nga El Niño, tungod kay posible nga mokunhod ang produksyon sa ikatulong kwarter.
Aron masuportahan ang mga mag-uuma, padayon ang mas taas nga pagpalit sa National Food Authority sa lokal nga palay, uban sa pinansyal nga tabang, crop insurance, irigasyon, kalidad nga binhi, mekanisasyon, ug pagpalambo sa mga pasilidad human sa ani.
Gipasalig usab sa DA nga walay ipatuman nga rice import ban aron masiguro ang padayon nga suplay sa barato nga bugas sa merkado ug mapadayon ang pagbaligya sa PHP20 kada kilo nga bugas pinaagi sa Kadiwa ng Pangulo ug mga akreditadong outlet sa tibuok nasod.
Photo Courtesy: PNA
