Gipasabot ni Cebu City Transportation Office (CCTO) Chief Raquel Arce nga ang mga motoristang masakpan nga nakalapas sa balaod atol sa implementasyon sa Oplan Bantal sa karsada gikan sa Talamban padulong Banilad pagamultahan og ₱1,000 alang sa unang paglapas pinaagi sa citation ticket.
Gihimo sa Dakbayan sa Sugbo ang Oplan Bantal aron mapalig-on ang pagpatuman sa balaod sa trapiko ug masiguro ang hapsay nga dagan sa mga sakyanan sa maong ruta.
Gipasabot usab ni Arce nga ang citation ticket kinahanglan mabayran sulod sa tulo ka adlaw aron malikayan ang dugang nga legal nga proseso batok sa nakalapas.
Matud pa sa CCTO, kon mapakyas ang motorista sa paghusay sa citation sulod sa gikatakdang panahon, ipasaka na ang angayng kaso subay sa mga ordinansa ug balaod niini.
Gidasig sa mga otoridad ang tanang motorista nga motuman sa mga Balaod sa trapiko ug makigtambayayong sa kalampusan sa Oplan Bantal aron mapadayon ang kaluwasan ug kahapsay sa dalan gikan sa dakbayan sa Sugbo.
Photo courtesy: MyTV Cebu
