Nakatala og dako nga kalampusan ang Bukidnon Police Provincial Office (BPPO) sa ilang kampanya batok sa kriminalidad human nagpahigayon og kinatibuk-ang 70 ka mga operasyon nga miresulta pagka-aresto sa 62 ka mga indibidwal gikan Hulyo 27 hangtod Agosto 2, 2026.
Gipahalipayan ni Provincial Director PCOL Oliver S. Navales ang tibuok kapolisan sa maong probinsya tungod sa ilang walay hunong nga dedikasyon sa pagpreserba sa kalinaw ug kaangayan sa Bukidnon.
Base sa datus sa bahin sa pagsumpo sa gidiling droga, nakapahigayon ang kapolisan og 11 ka operasyon ug pagka-aresto sa 12 ka tawo lakip ang pagkumpiska sa 117.894 ka gramo sa shabu nga nagkantidad og Php801,679.20. Samtang sa operasyon batok loose firearms ug illegal logging, miabot sa 14 ka armas ang nabawi ug Php43, 237.00 nga balor sa mga produktong lasang ang nakumpiska gikan sa mga nakalapas sa balaod.
Gawas niini, nagmalampuson usab ang mga operasyon batok sa illegal gambling, illegal fishing, illegal mining, ug smuggled cigarettes, lakip na ang pagka-aresto sa 15 ka mga wanted persons.
Padayon gihapon ang pagpasalamat ug pagdasig ni PCOL Navales sa tanang opisyal aron mas mapalig-on pa ang siguridad ug kaayohan sa tibuok lalawigan.
Photo Courtesy: BUKPPO
