Mibisita sa probinsya sa Bukidnon ang mga delegasyon gikan sa Province of Sultan Kudarat alang sa ilang Agricultural and Agri-Business technical learning exchange for coffee niadtong Agosto 6, 2026, sa Kaamulan Open Theater, Malaybalay City. Ang maong kalihokan kabahin sa padayon nga adbokasiya sa Provincial Government of Bukidnon sa pagpalig-on sa sektor sa kape ug sa pagpaambit sa ilang mga best practices ubos sa Bukidnon Coffee Roadmap.
Atol sa programa, gipasiugda ni Executive Assistant IV Atty. Romwell P. Roque ang suporta sa probinsya sa agrikultura isip haligi sa ekonomiya, samtang gipadayag usab ni Board Member Maria Loida De Manuel sa Sultan Kudarat ang paglaum sa mas lig-on nga pagtinabangay sa duha ka probinsya. Lakip sa mga highlights sa tigum mao ang presentasyon ni Provincial Planning and Development Coordinator Engr. Jesrel B. Mangubat bahin sa Bukidnon Coffee Roadmap, ingon man ang update gikan ni Provincial Agriculturist Maria Lilith M. Turan subay sa mga lakang aron mapataas ang kalidad sa kape, mapalapad ang merkado, ug madugangan ang kita sa mga mag-uuma.
Gawas sa Sultan Kudarat, una na nga mibisita sa Bukidnon alang sa susamang katuyuan ang mga delegasyon gikan sa Davao Oriental, Benguet, Surigao City, Abra, Agusan del Sur, ug Buenavista, Bohol, lakip na si DA Undersecretary Jerome Oliveros.
Pinaagi sa maong roadmap, gipaningkamutan sa administrasyon ni Governor Roque nga mahimong usa sa mga pangunang sentro sa dekalidad nga kape sa nasud ang Bukidnon samtang naghatag og dugang panginabuhian sa mga lokal nga mag-uuma ug nagpanalipod sa kinaiyahan
Photo Courtesy: LGU – Bukidnon
