Gibakwi na ang mga naunang alegasyon sa upat ka lalaki nga nagpailang kaniadto mga bodyguard ni kanhi Ako Bicol Party-list Representative Zaldy Co. Sa ilang giduso nga bag-ong sinumpaang salaysay, gibutyag sa upat nga dili tinuod ang ilang naunang pamahayag nga naglambigit kang Pangulong Ferdinand Marcos Jr., kanhi House Speaker Martin Romualdez, Zaldy Co, ug pipila pa ka mga personalidad sa giingong pag-apud-apod og mga maleta nga adunay sulod nga kwarta.
Gipadayag sa maong mga lalaki nga nitugot ug nipirma sila sa una nilang joint affidavit tungod sa gisaad kaniadto nga tabang pinansyal ug seguridad alang sa ilang tagsa-tagsa ka pamilya. Apan sa kasamtangan, nipadayag sila nga gusto na lamang nilang magpuyo nga madasigon ug malinawon tungod sa nadawat nga mga bahad sa ilang kinabuhi ug sa mga patung-patong nga kaso nga ilang giatubang karon sa korte.
Nasayran usab nga tulo sa maong upat ka lalaki ang nikonpirmar sa ilang naunang affidavit nga giduso kaniadto sa Office of the Ombudsman, diin gigamit kini nga basehan sa nagpadayong imbestigasyon batok kang Romualdez ug sa uban pang gipangalanan nga mga opisyal.
Photo Courtesy:Instagram
