Gimandoan sa Bangko Sentral ng Pilipinas (BSP) ang mga bangko ug ubang financial institutions ubos sa ilang pagdumala nga kinahanglang makakonekta sa National ID Authentication Services (NIDAS) sa Philippine Statistics Authority.
Sa usa ka draft memorandum, giingon sa Bangko Sentral ng Pilipinas (BSP) nga ang mga sakop nga institusyon kinahanglan nga makakonekta o maka-integrate sa National ID Authentication Services (NIDAS) alang sa customer due diligence (CDD).
Tumong niini ang pagpalig-on sa pag-verify sa identidad sa mga kliyente ug pagpalapad sa paggamit sa National ID isip opisyal nga pamatuod sa identidad.
Pinaagi sa NIDAS, mas mapalig-on ang Know Your Customer process sa mga bangko, ilabina sa pag-abli og bag-ong account, pagrehistro sa kustomer, ug pag-update sa impormasyon.
Kung wala pa makakonekta ang usa ka financial institution sa NIDAS, kinahanglan nilang gamiton ang National ID Check aron mapamatud-an ang National ID nga gipakita sa kliyente.
Matud ni BSP Governor Eli Remolona Jr., kabahin kini sa paningkamot sa BSP aron mapalambo ang digitalization ug mapalig-on ang integridad sa sistemang financial sa nasud.
Photo Courtesy: Philippine News Agency
