Pormal nang gi-turnover ngadto sa lungsod sa Cortes ang giila nga pinakataas nga footbridge sa tibuok Surigao del Sur kagahapon, Agosto 4, 2026. Ang opisyal nga turn-over sa Phase 3 sa maong proyekto nagtimaan sa hingpit nga pagkompleto sa imprastraktura nga magkonektar sa Barangay Burgos ug Barangay Tag-anongan.
Ang Phase 3, nga adunay Contract ID 25NH0061, naglakip sa pagtukod sa 372 metros nga bahin sa tulay ug gipondohan ubos sa General Appropriations Act (GAA) 2025 sa kantidad nga ₱38,999,153.67. Sa kinatibuk-an, ang maong tulay natukod pinaagi sa tulo ka hugna diin ang Phase 1 adunay 519 metros nga nahuman niadtong Mayo 15, 2024, ug ang Phase 2 adunay 522 metros nga nahuman niadtong Oktubre 15, 2025. Kapin sa ₱117.38 milyon ang kinatibuk-ang pondo sa tulo ka hugna nga gipatuman.
Miabot ngadto sa 1,538 metros o halos 1.6 kilometro ang kinatibuk-ang gitas-on sa tulay human madugangan ang 125 metros nga kasamtangang estruktura. Ang turn-over ceremony gitambongan ni Congressman Romeo S. Momo Sr., SP Henrich Pimentel nga nirepresentar kang Governor Johnny T. Pimentel, Cortes Mayor Frederick P. Yu, Vice Mayor Cherry B. Daraman, ug uban pang mga opisyal ug residente sa komunidad.
Gilauman nga kini nga footbridge makapauswag sa transportasyon, makapasayon sa pagbiyahe sa mga residente, ug makapadali sa pagdala sa mga produkto ug serbisyo tali sa duha ka barangay. Nagpadayag usab og dakong pasalamat ang lokal nga panggamhanan sa Cortes ngadto sa probinsyal nga panggamhanan alang sa padayon nga suporta nga nagdala og mas luwas ug episyenteng konektibidad sa lungsod.
photo courtesy:Jason and Kc
