Nagsang-at ang Oman og sugyot nga magtukod og joint regional management system alang sa Strait of Hormuz aron mapakunhod ang nagpadayon nga tensyon sa Middle East. Gisugyot kini sa mga opisyal sa Oman ngadto sa Iran atol sa ilang panagtagbo sa Tehran, diin gitumong nga dili na magbaton og eksklusibong kontrol ang Iran sa maong agianan ug imbes sundon ang modelo sa Strait of Malacca nga gidumala sa nagtinabangay nga mga nasud.
Ubos sa maong sugyot, magbayad ang mga shipping company og pondo nga gamiton sa pagmintinar sa mga navigation equipment, pagpanalipod sa kinaiyahan, ug sa mga search and rescue operations. Apan, pipila ka mga nasod sa Gulf ang misupak sa plano nga magpahamtang og bayranan sa mga barko, samtang gipatin-aw sa International Maritime Organization (IMO) nga wala pa kini sa opisyal nga negosasyon tungod kay kinahanglan pa kining usisahon ug aprobahan sa ilang ahensya.
Hinumdoman nga nagtukod na ang IMO og internasyonal nga mga shipping lane sa maong agianan sukad pa niadtong 1968, apan wala kini karon magamit tungod sa hulga sa mga Iranian mines.
Sa kasamtangan, giawhag sa Iran ang mga barko nga mogamit sa rutang mas duol sa ilang katubigan, samtang ang Estados Unidos nagtanyag usab og suporta alang sa mga barkong moagi sa bahin nga mas duol sa Oman
Photo Courtesy: Muscat Daily
