Gitaho sa Philippine Atmospheric, Geophysical and Astronomical Services Administration (PAGASA) nga duha hangtod upat ka bagyo ang posibleng mosulod sa Philippine Area of Responsibility (PAR) karong bulan sa Agosto.
Base sa ilang Climate Outlook, gilauman usab ang duha hangtod tulo ka bagyo sa Setyembre, usa hangtod duha matag bulan gikan sa Oktubre hangtod Disyembre, ug wala hangtod usa ka bagyo sa Enero 2027.
Naghatag usab og pasidaan ang state weather bureau nga posible nga mamugna ang usa ka kusog kaayong El Niño tali sa Oktubre 2026 ug Enero 2027. Bisan pa nga makapamenos kini sa kinatibuk-ang gidaghanon sa bagyo, gipatin-aw sa PAGASA nga adunay gihapoy posibilidad nga ang pipila sa mga mabuo nga maot nga panahon mokusog ug mahimong super typhoon.
Sa kasamtangan, halos normal nga gidaghanon sa ulan ang gilauman sa kadaghanan sa nasud karong Agosto, apan mas daghang ulan ang posibleng moigo sa Western Luzon samtang mas gamay nga pag-ulan ang masinati sa Southern Luzon, Visayas, ug Mindanao.
Dugang pa niini, nagpasidaan ang ahensya sa posibleng dry spell sa katapusan sa Agosto sa pipila ka dapit sa Eastern Visayas ug Mindanao, ug hulga sa drought sa pipila ka probinsya lakip na ang Cebu, Negros Oriental, ug Samar
Photo Courtesy: PAGASA-DOST
