Nagandam na ang Department of Energy (DOE) og bag-ong patakaran aron mas mapadali ug mapaspas ang pagpapakabit og solar panels ug battery storage systems sa mga kabahayan.
Sumala kang Energy Secretary Sharon Garin, tumong niini nga kuhaan ug pakunhoran ang mga gipangayong permit ug bureaucratic process alang sa mga pamilyang gustong mogamit og solar energy para sa ilahang kaugalingong konsumo sa kuryente ug dili para ibaligya sa distribution utility.
Gilaomang ipagawas ang maong bag-ong patakaran sulod sa usaka bulan. Mipadayag usab og dugang suporta si Pangulong Ferdinand Marcos Jr. pinaagi sa paghangyo sa Kongreso sa iyang ikalimang State of the Nation Address (SONA) nga paspasan ang pagpasa sa Sariling Kuryente Act aron mas mahimong barato, simple, ug dako og matabang sa pagpaubos sa bayronon sa kuryente sa matag pamilyang Pilipino.
Gipatin-aw sa DOE nga ang ilang gipangandam nga bag-ong polisiya haum kaayo sa tumong sa maong balaod, diin ang pangunang prayoridad mao ang pagkuha sa red tape ug ang pagpaspas sa paggamit sa renewable energy sa mga panimalay sa tibuok nasud
Photo Courtesy: GoSolar Philippines
