Nakadani ug daghang negatibong reaksyon gikan sa pipila ka mga netizen ang istorya sa mga bombero sa United Kingdom human ilang gikaon ang mga baboy nga ilang naluwas gikan sa sunog.
Tungod niini, nangayo sila og pasaylo human nga nagviral usab kini sa social media. Nasayran nga adunay 18 ka baktin ug duha ka inahan nga baboy ang giluwas sa mga bombero sa Pewsey, Wiltshire atol sa sunog niadtong Pebrero.
Apan paglabay sa unom ka bulan, giihaw ang mga baboy ug isip pagtuman sa saad, gihatagan sa mag-uuma nga si Rachel Rivers og mga sausage ang mga bombero isip pasalamat sa ilang pagluwas sa mga hayop. Gani, sa dihang gitilawan na kini sa mga bombero ilang gidayeg ang lami nga mga sausage.
Tungod sa pagkaylap niini sa social media, nangayo og pasaylo ang fire station sa mga tawong naapektuthan ug sumala pa sa kabomberohan nga ilang nasabtan nga adunay mga tawo nga nasakitan sa maong post.
Sa laing bahin, gisaway usab sa People for the Ethical Treatment of Animals (PETA) ang maong panghitabo.
Photo Courtesy: Vecteezy
