Naghangyo ang lokal nga kagamhanan sa San Fernando sa Department of Environment and Natural Resources (DENR) og Wood Recovery Permit aron pormal nga ma-recover ug magamit ang mga premium nga kahoy nga nangatumba sa dakong pagdahili sa yuta niadtong Hulyo 6 sa Sitio Balacayo, Barangay Kalagangan.
Ang maong landslide—tungod sa niaging kusog nga ulan gikan sa habagat ug Bagyong Inday (Bavi)—nibabag sa Bukidnon–Davao Highway diin ang pipila sa mga natumbang kahoy gibanabana nga nag-edad na og 50 hangtod 100 ka tuig. Aron malikayan ang pagpangawat sa mga timber poachers, nakig-alayon si Mayor Rogelio Yeke sa DENR-CENRO Valencia ug PENRO.
Sumala sa inisyal nga imbestigasyon, adunay dili ubos sa 21 cubic meters nga mga kahoy—sama sa Lawaan—ang pwedeng ma-salbar, ug kasamtangan kining ipundo sa municipal compound samtang gihulat pa ang opisyal nga pag-uyon gikan sa DENR Regional Executive Director.
Gipadayag ni Local Environment Officer Romeo Navaja nga kon maaprubahan na ang permiso, planong gamiton sa lokal nga gobyerno ang maong mga kahoy alang sa pampublikong pasilidad ug proyekto, lakip na ang pagtukod og Materials Recovery Facilities (MRF) ug mga temporaryong klasrum para sa mga komunidad sa Indigenous Peoples (IPs).
Samtang, nagpadayon pa gihapon ang clearing operations sa Department of Public Works and Highways (DPWH) sa maong highway aron sa hingpit nga paglimpyo sa dalan.
