Manghatag og libre nga coffee seedlings ang City Environment and Natural Resources Office (CENRO) Malaybalay ngadto sa mga napiling mag-uuma sa kabukiran isip kabahin sa programa sa pagpalambo sa panginabuhian ug pagpanalipod sa kinaiyahan.
Sa eksklusibong pakighinabi sa Juander Radyo Malaybalay ngadto kang CENRO Head Jessie Suson, gipangunahan sa City Government of Malaybalay ang maong inisyatiba aron mahatagan og alternatibong panginabuhian ang mga nagpuyo sa kabukiran pinaagi sa pagtanom og kape.
Matod pa ni Suson, gawas sa mahimong dugang nga kita sa mga mag-uuma, makatabang usab ang mga kahoyng kape sa pagpanalipod sa yuta, ilabina sa mga bakilid nga lugar.
Iyang gipasabot nga ang mga lugar sa Malaybalay nga kapin sa 1,000 metros ang kahabogon ibabaw sa lebel sa dagat angayan tamnan og Arabica coffee, nga adunay taas nga panginahanglan sa merkado ug limitado pa ang suplay
Dugang pa niya, ang ipanghatag nga mga coffee seedlings gitubo gikan sa dekalidad nga liso ug dili pinaagi sa pinutol nga sanga, aron masiguro ang maayong pagtubo ug produksyon.
Gilauman sa CENRO nga pinaagi sa maong programa, madugangan ang oportunidad sa panginabuhian sa mga mountain dwellers ug mapalambo ang coffee production sa dakbayan
Photo Courtesy: CityENRO Malaybalay
