Giaprubahan sa parlamento sa Myanmar ang bag-ong balaod nga nagpatuman death penalty batok sa mga responsable sa online scam operations, ilabina kadtong nanglugos o nangdetinar sa mga biktima aron pugson sa pagtrabaho sa mga cyber scam centers.
Ubos sa Anti-Online Scam Law, mahimong silotan og kamatayon ang mga mapamatud-ang nagpasakit, nagtortyur, o ilegal nga nagpugong sa mga tawo aron gamiton sa online scam operations. Ang mga nagdumala sa scam centers ug nalambigit sa cryptocurrency fraud mahimo usab nga mahatagan og silot nga hangtod tibuok kinabuhi nga pagkabilanggo.
Gipadayag sa gobyerno ni Presidente Min Aung Hlaing nga ang balaod kabahin sa ilang kampanya batok sa nagkalapad nga cyber scam industry, nga dugay nang giakusahan sa pagpamaligya sa mga biktima sa human trafficking ug pagpanglimbong sa mga internet users sa nagkadaiyang nasud.
Bisan pa niini, matud sa mga tigmonitor, nagpadayon gihapon ang operasyon sa daghang scam syndicates tungod sa kagubot sa nasud, diin ang uban niini mibalhin lamang sa ubang lugar sa Southeast Asia imbes nga hingpit nga mapahunong.
Photo Courtesy: AL.com
