Gikumperma sa militar sa Thailand nga nahuman na ang unang 1.3 kilometro nga bahin sa permanenteng border fence sa utlanan niini uban sa Cambodia isip kabahin sa pagpalig-on sa seguridad tali sa duha ka nasud.
Matud ni Thai Chief of Defence Forces General Ukrit Boontanon, ang konkretong pader nga adunay steel mesh ug concertina wire gitukod aron mahimong lig-on ug magdugay, ug napamatud-an usab sa mga pagsulay nga makapanalipod batok sa gagmayng armas.
Plano usab sa militar nga magdugang pa og kapin pito ka kilometro nga border fence ug susihon ang ubang bahin sa 817-kilometrong utlanan diin mahimo pang magtukod og susamang estruktura.
Nagpabilin nga adunay mga tropa sa duha ka kilid sa utlanan human sa duha ka serye sa armadong panagsangka niadtong miaging tuig nga naglambigit sa air strikes ug artillery attacks, nga nagresulta sa pagkamatay sa dul-an 150 ka tawo ug nakapabakwit sa kapin 300,000 ka residente.
Photo Courtesy: The straight Times
