Natapos sa 20 ka mga “friends rescued” (FRs) o kanhi mga rebelde ang ika-upat nga batch sa duha ka bulan nga Localized Deradicalization Program niadtong Hulyo 15, 2026, didto sa Kaamulan Open Theater, Kaamulan Park, Malaybalay City, Bukidnon.
Sa maong aktibidad, giila ang kaisog ug determinasyon sa mga FRs sa pagbiya sa ilang kanhi kinabuhi aron magsugod og usab ubos sa giya sa kagamhanan. Sa kinatibuk-ang gidaghanon, lima ka FRs ang gikan sa kostudiya sa 1003rd RMFB, tulo gikan sa 88IB, lima gikan sa 1st SF, ug pito gikan sa 89IB.
Gipasalamatan sa mensahe ni Governor Rogelio Neil “Oneil” Roque, ang hugot nga suporta sa E-CLIP Committee, lakip na ang DILG-Bukidnon, PSWDO, DSWD, PNP, AFP, ug ang mga kaabag sa akademe sama sa Central Mindanao University (CMU) ug Mountain View College. Iyang gipasabot nga ang kalampusan sa maong programa dili lang tungod sa paghuman sa mga aktibidad, kondili tungod sa hiniusang tinguha nga ihatod ang mga kanhi rebelde balik sa normal, malinawon, ug hamugaway nga pagpuyo kauban ang ilang pamilya
Aron masiguro nga dili mameligro ang ilang pagbag-o, nagpasalig ang kagamhanang lokal sa Bukidnon kauban ang DSWD nga magpadayon ang pag-apod-apod og hinabang sama sa food packs ug uban pang suporta alang sa ilang mga anak. Bisan pa man kon taas ug adunay mga hagit ang dalan padulong sa hingpit nga kalinaw, andam ang probinsya nga mogiya ug motabang kanila aron magpadayon sa pagkab-ot sa ilang mga pangandoy sa kinabuhi
Photo Courtesy:LGU Bukidnon
