Gipahigayon sa Malaybalay City Tourism Office ang usa ka coordination meeting niadtong Hulyo 14, 2026 didto sa Barangay Hall sa Dalwangan aron pinal hisgutan ang mga pagpangandam alang sa umaabot nga ika-30 nga “Aldaw ta Kitanglad” sa Nobyembre.
Karong tuiga, ang Kagamhanang Lokal sa Malaybalay ang mag-host sa maong selebrasyon diin ang tanang dagkong kalihokan ipahigayon sa Barangay Dalwangan, nga nailang usa sa mga agianan padulong sa Mt. Kitanglad Range Natural Park (MKRNP).
Ang maong tigom gitambongan sa mga representante gikan sa siyudad, Barangay Council, Protected Area Management Office (PAMO), ug si Bae Inatlawan nga Chieftain sa Daraghuyan Tribe, aron masiguro ang hapsay nga koordinasyon sa gobyerno ug sa lumad nga komunidad.
Ubos sa tema nga “30 Years of Protecting Kitanglad: Celebrating Shared Indigenous Heritage and Stewardship,” gi-detalye sa mga tigpasiugda ang badyet, logistika, ug mga aktibidad nga magpasidungog sa tulo ka dekada nga pagpanalipod sa kinaiyahan ug kultura sa maong parke.
Human sa diskusyon, naghimo usab og site inspection ang grupo sa mga pasilidad sa Barangay Dalwangan aron masusi ang kaandam, kaluwasan, ug puy-anan sa mga bisita, tribal elders, ug mga Kitanglad Guard Volunteers (KGVs).
Tumong sa maong tulo ka adlaw nga selebrasyon nga mas mapalig-on ang kahibalo sa publiko sa pagpreserba sa biodiversity sa bukid ug sa pag-ila sa dako nga papel sa mga Lumad isip magbalantay niini.
Photo Courtesy: Civil Tourism Malaybalay
