Gitudlo sa bag-ong testigo nga ang ginikanan mismo ang responsable sa kamatayon ni Baby Ian Meñoza, ang dos-anyos nga bata nga nakit-ang patay sa Barangay Camayahan, Butuan City, niadtong Hulyo 29.
Kahinumdoman nga nawala si Baby Ian niadtong Hulyo 23, samtang ang iyang inahan nga si Wilma naglimpyo sa gawas sa ilang balay. Base sa autopsy, nakaangkon ang bata og grabeng mga samad sa ulo ug aping nga posibleng resulta sa pag-igo sa gahi nga butang.
Human sa kapin duha ka bulan nga walay klarong suspek, gipataas ni Senador Raffy Tulfo ang ganti gikan sa ₱500,000 ngadto sa ₱1,000.000.00 ka pesos, alang sa makahatag og impormasyon nga mosangpot sa pagdakop ug pagkaso sa responsable sa krimen.
Niadtong Oktubre 15, sa Programa sa Senador, ning lutaw si Barangay Kagawad Ruben Canoy, nga silingan sa pamilya, ug miangkon nga adunay iyang nakita sa buntag sa pagkawala sa bata.
Matod ni Canoy, nakita matod pa niya gikan sa gilay-on nga mga 30 metros nga gihampak ni Wilma si Baby Ian gamit ang kuptanan sa silhig lanot human kini magdumili ang bata sa pagsaka sa balay. Giingon usab niya nga gikuha pa ang laing usa ka gahi nga kahoy ug gigamit sa pag-bunal pag-usab sa bata.
Tungod niini, gipangutana ni Senador Tulfo ang kagawad kon nganong wala siya manghilabot o mosumbong dayon sa mga awtoridad kon tinuod nga nasaksihan niya ang maong insidente.
Depensa ni Canoy, mibalik matod pa siya aron susihon ang kahimtang bata og pahimangu-an ang inahan nga si Wilma, apan wala na didto ang bata kay Nawala kini og napuno na sa kandila ang ilang panimalay gikan sa hagdan, sala, ug kwarto.
Sa pagkakaron, ang maong pahayag kinahanglan pang susihon sa mga imbestigador aron mapamatud-an ang kamatuoran ug matino ang posibleng kalambigitan sa mga hingtungdan sa pagkamatay ni Baby Ian.
Photo courtesy: Jhon Paul Consad
