Nagpatabang sa Tagum City Police Station ang usa ka 40 anyos nga babaye kinsa giila sa alyas Joy human nawala ang iyang duha ka binuhing kanding sa Barangay San Miguel, Tagum City, Davao del Norte, niadtong buntag sa Oktubre 19, 2026.
Sumala sa report, nadiskobrehan sa iyang ka-live-in nga wala na ang duha ka kanding nga gibutang sa gawas sa ilang pinuy-anan samtang nangandam kini sa pagpakaon sa mga hayop, mga alas 7:00 sa buntag.
Base sa CCTV footage, adunay nakita nga upat ka lalaki nga nagsakay sa duha ka motorsiklo kinsa gituohang maoy mikarga ug mikuha sa mga kanding.
Padayon karon ang imbestigasyon sa kapulisan aron mailhan ang mga tawo nga posibleng nalambigit sa insidente. Gihangyo usab sa Tagum City Police Station ang publiko kinsa adunay impormasyon nga makatabang sa kaso nga makig-alayon sa mga awtoridad aron masubay ang mga responsable sa maong krimen.
Photo Courtesy: James Yap
