Sikop sa mga personahe sa Tagbina Municipal Police Station ang giilang Top 9 Most Wanted Person sa lebel sa probinsya niadtong nakalabay nga adlaw sa Purok 3, Barangay Bagacay, Del Carmen, Surigao del Norte.
Nahitabo ang malampusong operasyon pinaagi sa tracker team sa Tagbina MPS nga gipangulohan ni PCMS Erwin B. Manticahon ug ubos sa superbisyon ni PCPT Mark Steven Y. Sarsonas, ang Acting Chief of Police. Nakig-alayon usab ang maong buhatan sa Del Carmen Municipal Police Station nga ubos sa pamunoan ni PCPT Felomino A. Cruiz, ug sa SDS PHPT–RHPU 13 nga gipangulohan ni PCPT Elson Holmes C. Valdez.
Gisilbi ang pag-aresto pinasikad sa warrant of arrest sa kasong Carnapping nga giisyu sa Presiding Judge sa Regional Trial Court, 11th Judicial Region, Branch 29 sa Dakbayan sa Bislig niadtong Disyembre 1, 2003. Girekomenda sa korte ang pyansa nga nagkantidad og Php 25,000.00 alang sa temporaryong kagawasan sa akusado.
Human sa pagdakop, gipahibalo dayon ang dinakpan sa iyang mga katungod ubos sa batakang balaod o Miranda rights, mga probisyon sa Anti-Torture Act, ug ang paggamit sa Alternative Recording Device subay sa mga legal nga proseso ug regulasyon.
Photo courtesy:Tagbina Mps
