Mikabat na sa kapin ₱12.5 milyon ang kantidad sa kadaot sa sektor sa agrikultura tungod sa epekto sa miaging Bagyong Inday, sumala sa Department of Agriculture (DA).
Gipadayag sa ahensya nga mokabat sa 1,078 ka mag-uuma ang naapektuhan sa dul-an 500 ka ektarya nga umahan sa upat ka rehiyon, lakip ang Calabarzon, Mimaropa, Western Visayas, ug Negros Island Region.
Base sa inisyal nga kwentada sa DA Disaster Risk Reduction and Management Operations Center, nawad-an og gibanabana nga 107 metric tons nga produksyon ang mga apektadong lugar, bisan pa nga padayon pa ang validation sa mga datos.
Gilauman usab sa DA nga mosaka pa ang kantidad sa kadaot samtang nagpadayon ang assessment sa mga naapektuhang komunidad.
Isip tubag, nag-andam ang ahensya og nagkadaiyang suporta alang sa mga mag-uuma ug mangingisda, lakip ang agricultural inputs, Survival and Recovery Loan Program, ug indemnification alang sa mga insured nga mag-uuma.
Photo Courtesy: Philippine News Agency
