Gipahibalo sa University of the Philippines–Philippine General Hospital (UP-PGH) sa Sandiganbayan Third Division nga walay pneumonia si Senador Rodante Marcoleta base sa resulta sa medikal nga eksaminasyon nga gihimo kaniya.
Ang report sa ospital kabahin sa opisyal nga dokumentong gisumite sa korte aron mapatin-aw ang tinuod nga kahimtang sa panglawas sa senador. Sumala sa PGH, negatibo ang resulta sa mga check ups nga gihimo kalabot sa gidudahang pneumonia ug walay nakitang ebidensya sa impeksiyon sa baga.
Ang maong pahayag nagtumong sa paghatag og tukmang impormasyon taliwala sa mga alegasyon mahitungod sa kahimtang sa iyang panglawas.
Gilauman nga gamiton sa Sandiganbayan ang maong medical report isip basihan sa umaabot nga mga lakang sa kaso. Sa miaging mga adlaw, mihangyo ang kampo ni Marcoleta nga magpabilin una siya sa ospital tungod sa iyang gibating mga sintomas nga gidudahang may kalabutan sa pneumonia o ubang sakit.
Photo Courtesy:Wikipedia
