Pinangunahan ng 33rd Infantry o Makabayan Battalion ng Philippine Army ang isang dayalogo para sa mapayapang pagresolba sa hidwaan sa lupa sa pagitan nina Ginoong Nhogs Tukas ng Barangay Nabalawag, Special Geographic Area o SGA-BARMM, at Kadayangan Municipal Councilor Hon. Muslimin U. Antao.
Pinangunahan ni Lieutenant Colonel Germen T. Legada, Commanding Officer ng 33IB, katuwang si Captain Emerjhon Jamal A. Seña, ang pagpupulong na naglalayong maresolba ang hindi pagkakaunawaan sa pamamagitan ng bukas at maayos na pag-uusap.
Nakiisa rin sa dayalogo ang mga kinatawan ng Philippine National Police, lokal na pamahalaan, mga peace mechanism, at Bangsamoro Islamic Armed Forces o BIAF upang suportahan ang proseso ng pagresolba sa hidwaan.
Nagtapos ang pagpupulong sa paglagda ng magkabilang panig sa isang kasunduan na naglalayong igalang ang mga napagkasunduan, palakasin ang koordinasyon, at lutasin ang anumang susunod na hindi pagkakaunawaan sa pamamagitan ng mapayapang pag-uusap.
Bahagi ang aktibidad ng patuloy na pagsisikap ng Philippine Army at mga katuwang na ahensiya na mapanatili ang kapayapaan, kaayusan, at pagkakaisa sa Special Geographic Area ng Bangsamoro.
