Pinalalakas ng Ministry of the Interior and Local Government o MILG ang kakayahan ng walong munisipalidad ng Special Geographic Area o SGA sa pagpaplano ng mga programa at proyektong magtataguyod ng lokal na kaunlaran.
Sa pamamagitan ng Local Government Development Division o LGDD, sa ilalim ng Operations Management Service, isinagawa ang training-workshop tungkol sa pagbuo ng Local Development Investment Plan o LDIP at Annual Investment Plan o AIP.
Layunin ng dalawang araw na aktibidad na palawakin ang kaalaman at praktikal na kasanayan ng mga kawani ng lokal na pamahalaan sa pagtukoy ng mga prayoridad na pangangailangan ng kanilang mga komunidad.
Sa pamamagitan ng pagsasanay, inaasahang mas maayos na maisasalin ang mga prayoridad sa mga konkretong programa, proyekto, at aktibidad na may nakalaang badyet at maaaring ipatupad ng mga lokal na pamahalaan.
Mahalaga ang estratehikong pagpaplano upang matiyak na ang mga pondong pampubliko ay magagamit sa mga proyektong may malinaw na layunin at direktang makatutulong sa mamamayan.
Sa ganitong paraan, layunin ng MILG na palakasin ang mahusay na pamamahala at matiyak ang mas inklusibo at pangmatagalang kaunlaran sa walong munisipalidad ng SGA.
