Palapdan pa sa Canadian business process outsourcing (BPO) firms nga NQX ug TELUS Corporation ang ilang mga pamuhunan sa Pilipinas, nga gilauman makahatag og milyon-milyong piso nga kapital ug dugang nga mga trabaho sa nasud.
Sumala sa Department of Trade and Industry (DTI), napalig-on ang maong mga plano atol sa mga panagtagbo ni Presidente Ferdinand Marcos Jr., DTI Secretary Cristina Roque, Finance Secretary Frederick Go, ug mga opisyal sa duha ka kompanya sa iyang opisyal nga pagbisita sa Canada niadtong Hulyo 3.
Ang NQX, pinaagi sa Quantrics Enterprises Inc., maglunsad og P632 milyon nga proyekto aron mapalapad ang operasyon niini sa mga probinsya. Gilauman nga makamugna kini og 725 ka direktang trabaho sa gawas sa Metro Manila, lakip ang posibleng mga lokasyon sa Laoag, Dagupan, ug Legazpi.
Samtang, palapdon usab sa TELUS Corporation ang serbisyo niini sa Pilipinas sa mga bahin sa artificial intelligence (AI), healthcare support, software engineering, ug workforce development. Sukad 2018, kapin na sa $175.6 milyon ang gipuhunan sa kompanya sa nasud.
Sa pagkakaron, kapin sa 24,000 ka empleyado ang gitrabaho sa TELUS Digital Philippines sa Metro Manila ug Iloilo.
Matod sa DTI, nagpakita ang maong mga pamuhunan sa padayon nga pagsalig sa mga langyawng kompanya sa Pilipinas isip maayong destinasyon sa negosyo ug tinubdan sa dekalidad nga mga trabaho, ilabina sa mga probinsya.
Photo Courtesy:www.invensis.net
