Misaka pag-ayo ang polusyon sa hangin sa Washington, D.C. human sa dakong fireworks display atol sa pagsaulog sa U.S. Independence Day nga gipaluyohan sa administrasyon ni Presidente Donald Trump.
Base sa datos sa IQAir, nahimong labing masangit nga dakbayan sa kalibotan ang Washington sulod sa pipila ka oras tungod sa grabeng aso nga namugna sa fireworks display.
Giplano sa kompanyang Pyrotecnico ang paglansad og hangtod 850,000 ka fireworks aron mabungkag ang world record. Apan sa wala pa ang kalihokan, mipasidaan ang mga eksperto nga mahimo kining makadaot sa panglawas tungod sa posibleng taas nga lebel sa polusyon sa hangin.
Sumala sa mga tigmonitor sa kalidad sa hangin, misaka sa peligroso nga lebel ang pinong partikulo sa hangin nga mahimong mosulod sa baga ug makapahinungdan og mga sakit sa pagginhawa. Giisyu usab ang Code Purple air quality alert sa Washington ug sa kasikbit nga mga lugar, nga nagpasabot nga dili himsog ang kalidad sa hangin alang sa tanan.
Human sa kusog nga ulan niadtong Domingo, mibalik sa normal ang kalidad sa hangin sa siyudad.
Samtang, wala pa makumpirma sa Guinness World Records kon nabungkag ba sa maong fireworks display ang kasamtangang world record, nga gitakda sa Pilipinas niadtong 2016 pinaagi sa kapin 811,000 ka fireworks.
Photo Courtesy: WESH 2 News
