Padayon nga gipalapdan sa Shoppee ang suporta alang sa mga online sellers ug lokal nga negosyo pinaagi sa ilang “Shopee Live on Wheels” mobile activation nga gilunsad sa Cebu IT Park.
Tumong sa maong kalihokan ang pagdasig sa mas daghang negosyante sa paggamit sa digital commerce pinaagi sa live-selling sessions, diretsong interaksyon sa mga konsumidor, ug mga espesyal nga diskwento alang sa mga mamalitay.
Matud pa sa kompanya, padayon ang pagtubo sa digital transformation sa mga micro, small, ug medium enterprises o MSMEs sa Visayas ug Mindanao.
Base sa report nga “The State of Digital MSMEs in VisMin,” misaka og 51 porsyento ang average nga gidaghanon sa orders matag seller tali sa tuig 2023 ug 2025.
Gipadayag usab nga mas daghang negosyo sa mga probinsya ang naggamit karon sa digital tools sama sa Shopee Live, Shopee Video, ug AI-powered chat assistants aron mapalapad ang ilang merkado ug maabot ang mga kostumer sa tibuok nasud.
Kabahin kini sa programang “Tatak Pinoy” nga nagtutok sa pagpalambo ug pagpasikat sa mga produktong lokal nga hinimo sa mga Pilipino.
Nagtuo ang kompanya nga ang kombinasyon sa online ug personal nga marketing activities makatabang sa MSMEs aron mas mapalig-on ang ilang negosyo ug mapadako pa ang ilang kita sa nagkadakong digital economy.
Photo Courtesy: Tech in Asia
