Nag-viral sa social media ang duha ka lalaki, didto sa nasud sa Indonesia,human madakpan sa mga residente tungod sa gikaingong pagsulod sa usa ka establisemento aron mangawat.
Sumala sa report, wala na makalingkawas ang duha ka suspetsado kay naabtan sila sa mga lumulupyo sa wala pa sila makabiya sa lugar.
Apan imbis nga gapuson lamang samtang naghulat sa kapulisan, giputos sila sa mga residente gamit ang orange adhesive tape gikan ulo hangtod tiil. Ang usa kanila gibutangan og porma nga murag antena sa ulo, nga nakahatag og kataw-anan nga dagway ug nakapahinumdom sa daghang netizens sa usa ka karakter sa TV.
Ang bidyo sa maong insidente dali nga mikatag online ug nakahatag og nagkadaiyang reaksyon. Adunay mga netizens nga nalingaw sa nahitabo, samtang ang uban mipahayag og kabalaka nga basin milapas na kini sa angay nga pagtratar sa mga suspetsado.
Sa ulahi, gitugyan gihapon ang duha ka lalaki ngadto sa mga awtoridad aron atubangon ang hustong legal nga proseso.
Photo Courtesy: Wild Heart
