Garbo karon sa Schools Division of Bukidnon ang migula nga resulta sa National Assessment for School Heads (NASH) alang sa Fiscal Year 2025 (Batch 2) diin gikan sa 238 ka mga school head candidates nga mikuha sa assessment, duha ang mapasigarbohong giila isip Regional Top Performers sa tibuok Region X (Northern Mindanao).
Kini sila si Rosemarie R. Bacus gikan sa New Tubigon ES (Maramag II) ug Gerardo C. Salcedo gikan sa Mahawan ES (Maramag III) kinsa nanguna sa tibuok rehiyon human makuha ang labing taas nga grado sa maong assessment nga nagsukod sa katakos sa mga lider sa tunghaan.
Subay sa opisyal nga NASH Competency Level Matrix, 77 ka takers ang opisyal nang nahimong prospective candidates alang sa posisyon nga School Principal, diin 46 niini ang nakapasar sa upat ka domains sa Philippine Professional Standards for School Heads (PPSSH) ug 31 usab ang nakapasar sa tulo ka domains. Samtang, ang laing 161 ka mga takers nga nahisakop sa “With Developmental Areas” gikatakda nga mopaubos sa mga Professional Development Interventions (PDI) ug Work Application Plan (WAP) aron mapalambo pa ang ilang kakayahan sa dili pa makonsidera isip Principal I.
Tungod niining dakong garbo, nagpaabot sa iyang kinatibuk-ang pagpahalipay si Schools Division Superintendent Victoria V. Gazo sa tanang mikuha sa maong lisod ug estrikto nga assessment tungod sa ilang gipakitang kaisog ug dedikasyon sa propesyonal nga kalamboan.
Gipahinumdoman usab ni Gazo ang mga takers nga anaa pa sa developmental status nga ang NASH dili usa ka finish line kondili usa ka kumpas nga magtultol kanila sa mga husto nga katakos nga angay pang palambuon aron mas maserbisyohan ang mga tunghaan ug mga magatungha sa probinsiya
Photo Courtesy: DepEd Bukidnon
