Gipahinumdoman ni SFO2 Laurence Cambari, ang Chief sa Fire Safety Enforcement sa Malaybalay City Fire Station, ang mga residente—ilabina kadtong anaa sa mga layong barangay gikan sa sentro sa syudad—mahitungod sa kaimportante sa paspas ug saktong komunikasyon kung adunay mga emerhensiya sama sa sunog.
Sa pakighinabi sa Juander Radyo Malaybalay, iyang gipasiugda nga kinahanglan adunay aktibong contact number ang matag layong barangay. Pinaagi niini, dali nga makapahibalo ang mga residente ngadto sa ilang mga opisyal sa barangay, nga mao usab ang daling mokoordinar ug mopasa sa impormasyon ngadto sa Malaybalay City Fire Station alang sa paspas nga pagresponde
Dugang pa ni Cambari, ang mga bag-ong nabaid nga responders ubos sa auxiliary group mao ang unang mohatag og dinaliang tabang sa dapit nga nahitaboan samtang nagbiyahe pa ang mga bombero. Tungod niini, importante kaayo nga ang maong mga responder’s adunay kopya sa opisyal nga emergency hotline numbers sa syudad.
Kini nga lakang gitumong aron masiguro ang hapsay ug epektibong koordinasyon sa panahon sa kalamidad ug emerhensiya. Sa ingon niini nga sistema, mapugngan ang mas dako nga danyos ug masalbar ang kinabuhi ug kabtangan sa mga residente sa Malaybalay.
Photo Courtesy: LGU- Bukidnon
