Nadala sa tambalanan ang 19-anyos nga si alyas “Gerry” ulitawo human nadunggaban sa iyang kaugalingong bayaw gumikan sa bikil sa utang biyernes sa gabii, Hulyo 3, 2026, didto sa Sitio Kauswagan, Barangay Little Baguio lungsod sa San Fernando.
Base sa inisyal nga imbestigasyon sa kapolisan, giingong giadtoan sa biktima ang balay sa suspek aron komprontahon kini kabahin sa ilang bikil sa utang sa miaging adlaw, apan kalit siyang giduol sa suspek gikan sa luyo ug gidunggab sa wala nga bahin sa iyang hawak gamit ang usa ka jungle knife.
Human sa krimen, dali nga misibat palayo ang suspek bitbit ang maong hinagiban samtang ang biktima dinalian usab nga gidala sa Bukidnon Provincial Hospital kinsa anaa ra sa luwas nga kahimtang.
Hinuon boluntaryo nga nitahan sa iyang kaugalingon ang suspek ngadto sa San Fernando Municipal Police Station (MPS) sa samang gabii, pasado alas-11:50, dala ang kutsilyo nga iyang gigamit.
Sa pagkakaron, ang suspek nagpabiling balhog sa selda sa kapulisan samtang giandam ang tukmang kasong kriminal nga ipasaka batok kaniya ngadto sa Office of the Prosecutor.
