Pormal nang gimugna sa Department of Energy (DOE) ang Task Force on Energy Carbon Credits (TFECC) pinaagi sa usa ka Department Order niadtong Hunyo 18. Kini nga task force maoy motutok sa saktong pagpatuman sa mga polisiya sa carbon credit sa sektor sa enerhiya.
Pangunahan ang TFECC sa Undersecretary sa DOE alang sa Energy Policy and Planning Bureau (EPPB). Sila ang gitahasan sa pagdumala sa carbon markets, climate policy, ug pagkab-ot sa commitment sa nasod ubos sa Paris Agreement nga mapakunhod og 75 porsyento ang greenhouse gas (GHG) emissions sa tuig 2030.
Matud ni Energy Secretary Sharon Garin, dako kini nga kahigayonan alang sa Pilipinas aron makakuha og global financing ug advanced technologies pinaagi sa pagbaligya sa Carbon Credit Certificates (CCCs).
Lakip sa mga kwalipikadong proyekto nga makakuha og CCCs mao ang boluntaryong pagpasira sa mga coal power plants, pagpalapad sa renewable energy, paggamit sa energy-efficient technologies, ug pagbalhin ngadto sa mga electric vehicles (EVs).
Photo Courtesy: Manila Bulletin
